ఈ నెల 6 నుంచి తెలంగాణ అసెంబ్లీ సమావేశాలు ప్రారంభంకానున్నాయి. ఈ నెల 6న ఉదయం 11.30 గంటల నుంచి అసెంబ్లీ, మండలి సమావేశాలు ప్రారంభమవుతాయి. అసెంబ్లీ సమావేశాలకు ముందు మంత్రివర్గ సమావేశాన్ని నిర్వహిస్తారు. అసెంబ్లీ నిర్వహణతో పాటు పలు అంశాలపై ఇందులో చర్చిస్తారు. గడిచిన అసెంబ్లీ సమావేశాలు ఈ ఏడాది మార్చి 7 నుంచి 15 వరకు జరిగాయి. అనంతరం వర్షాకాల సమావేశాలు జరగాల్సి ఉన్నా.. ఇప్పటి వరకు జరగలేదు. స్వాతంత్య్ర వజ్రోత్సవాల వేడుకల సందర్భంగా ఒకరోజు అసెంబ్లీ సమావేశం నిర్వహించాలనుకున్నా.. ఆ ఆలోచనను ఉపసంహరించుకున్నారు. అయితే నిబంధనల ప్రకారం ప్రతి ఆరు నెలలకోసారి సభ సమావేశం కావాలి. ఈ దృష్ట్యా చూస్తే మార్చి 15తో గత సమావేశాలు ముగిశాయి. అందువల్ల సెప్టెంబరు 6న సమావేశాలు నిర్వహించాలని నిర్ణయం తీసుకున్నారు.
