విధి నిర్వహణలో ఆర్టీసీ సిబ్బంది నిజాయితీని నిరూపించుకున్నారు. బస్సుల్లో ప్రయాణికులు పొగొట్టుకున్న రూ.19 లక్షల విలువైన వస్తువులతో కూడిన బ్యాగులను వారికి అందజేసి మానవత్వం చాటుకున్నారు. మూడు వేర్వేరు ఘటనల్లో ప్రయాణికులు మర్చిపోయిన బ్యాగులను వారికి అందజేసిన సూర్యాపేట, మియాపూర్‌-2 డిపోలకు చెందిన సిబ్బంది కె.అంజయ్య, యాకుబ్‌ పాషా, ముబీన్‌, రమేశ్‌లను ఆర్టీసీ ఎండీ సజ్జనార్‌ అభినందించారు. శుక్రవారం బస్‌ భవన్‌లో వారిని ఉన్నతాధికారులతో కలిసి సన్మానించారు. ప్రయాణికులు పొగొట్టుకున్న బ్యాగులను తిరిగి వారికి అందజేయడం ఆర్టీసీ సిబ్బంది నిజాయితీకి నిదర్శనమన్నారు.
