అటవీ, పర్యావరణ శాఖ మంత్రి కొండా సురేఖ ఓఎస్టీ తొలగింపు

• తీవ్ర ఆరోపణల నేపథ్యంలో చర్యలు
• సుమంత్ ను తొలగిస్తూ పీసీబీ ఉత్తర్వులు

అటవీ, పర్యావరణ, దేవాదాయశాఖల మంత్రి కొండా సురేఖ కార్యాలయంలో ఆఫీసర్ ఆన్ స్పెషల్ డ్యూటీ (ఓఎస్టీ)గా పని చేస్తున్న సుమంత్ ను రాష్ట్ర ప్రభుత్వం తొలగించింది. సుమంత్ తెలంగాణ కాలుష్య నియంత్రణ మండలి (టీజీపీసీబీ)లో కాంట్రాక్ట్ పద్ధతిలో నియమితుడు కాగా, డిప్యుటేషన్ పై మంత్రి కొండా సురేఖ వద్ద ఓఎన్డీగా పనిచేస్తున్నారు. అయితే, తీవ్రమైన ఆరోపణలు, ఫిర్యాదుల నేపథ్యంలో ఆయన సేవలను తక్షణమే రద్దు చేస్తూ టీజీపీసీబీ సోమవారం ఉత్తర్వులు జారీ చేసింది. ఈ ప్రభుత్వం ఏర్పడిన తర్వాత.. అటవీ, పర్యావరణ మంత్రి నుంచి వచ్చిన నోట్ ఆధారంగా 2024 ఫిబ్రవరిలో సుమంత్ ను పీసీబీలో ఓఎస్జీగా నియమించి.. డిప్యుటేషన్ పై మంత్రి పేషీకి పంపారు. అప్పటి నుంచి మంత్రి పేషీలో ఓఎస్జీగా పనిచేస్తున్న ఈయనపై అనేక ఆరోపణలు వచ్చినట్లు తెలిసింది. ప్రతి విషయంలోనూ జోక్యం చేసుకోవడం, అధికారులపై ఒత్తిడి తేవడం, కాలుష్యకారక పరిశ్రమల విషయంలో జోక్యం చేసుకోవడం సహా పెద్ద ఎత్తున ఫిర్యాదులు వచ్చినట్లు సమాచారం. కొందరు నేరుగా ముఖ్యమంత్రి కార్యాలయానికి కూడా ఫిర్యాదు చేసినట్లు తెలిసింది. ఇటీవల మరింత తీవ్రస్థాయిలో ఆరోపణలు రావడంతో ముఖ్యమంత్రి రేవంత్ రెడ్డి ఆగ్రహం వ్యక్తం చేసినట్లు సమాచారం. ఇలాంటి వారిపై విచారణ జరిపి చర్యలు తీసుకోవాల్సిందిగా ప్రభుత్వ ప్రధాన కార్యదర్శిని, సంబంధిత శాఖల అధికారులను ఆదేశించినట్లు తెలిసింది. నిఘా విభాగం కూడా సుమంత్ కార్యకలాపాల గురించి సవివరంగా నివేదించినట్లు తెలుస్తోంది. ఈ నేపథ్యంలోనే ఆయనను తొలగిస్తూ పీసీబీ మెంబర్ సెక్రెటరీ రవి గగులోతు మంగళవారం ఆదేశాలు జారీ చేశారు. మంత్రుల మధ్య అంతర్గత విభేదాలకు కారణమయ్యేలా సమాచారాన్ని లీక్ చేస్తున్నారనే ఫిర్యాదులు సీఎంఓ దృష్టికి వెళ్లాయి. రాష్ట్రంలో అతి ముఖ్యమైన వేడుకగా పరిగణించే మేడారం జాతర టెండర్ల వ్యవహారంలోనూ గోల్మాల్ కు యత్నించారన్న ఆరోపణలు వచ్చాయి. సెటిల్మెంట్లు చేయడంతోపాటు ప్రభుత్వ వ్యతిరేక కార్యకలాపాలకు పాల్పడుతున్నాడని ఇంటెలిజెన్స్ విభాగం సమగ్ర నివేదిక సమర్పించింది. ఈ నివేదికల ఆధారంగానే సీఎం నేరుగా సుమంత్ తొలగింపునకు ఆదేశించినట్లు తెలుస్తోంది. మంత్రుల పేషీల్లో కీలక స్థానాల్లో పనిచేస్తున్న పీఎస్ లు, ఓఎస్డీలు, పీఆర్ఓలపై వస్తున్న ఆరోపణలను ప్రభుత్వం చాలా సీరియస్ గా తీసుకుంటుంది. ప్రభుత్వ వర్గాల్లో జరుగుతున్న అంతర్గత చర్చల ప్రకారం.. తొలగించాల్సిన వారి లిస్ట్ లో మరికొందరు ఉన్నట్లుగా తెలుస్తుంది.