- సినిమా పరిశ్రమ అభివృద్ధి కోసం ప్రభుత్వ పాలసీ అంశాల పై ఇరువురి మధ్య చర్చ
- మహారాష్ట్ర ఫిల్మ్ సిటీని విజిట్ చేయాలని మంత్రి కోమటి రెడ్డిని ఆహ్వానించిన మహారాష్ట్ర మంత్రి ఆశిష్ శెలార్
హైదరాబాద్: రాష్ట్ర రోడ్లు భవనాలు, సినిమాటోగ్రఫీ శాఖ మంత్రి కోమటి రెడ్డి వెంకట్ రెడ్డి తో మహారాష్ట్ర ఐటీ,సాంస్కృతిక, సినిమాటోగ్రఫీ శాఖ మంత్రి ఆశిష్ శెలార్ డా.బి.ఆర్ అంబేడ్కర్ రాష్ట్ర సెక్రటేరియట్ లో శుక్రవారం భేటీ అయ్యారు. సినిమా పరిశ్రమ అభివృద్ధి కోసం తెలంగాణ రాష్ట్ర ప్రభుత్వ పాలసీ అంశాల పై ఇరువురి మధ్య చర్చ జరిగింది.
ముఖ్యమంత్రి రేవంత్ రెడ్డి నాయకత్వంలో తెలంగాణ రాష్ట్ర ప్రభుత్వం సినిమా నిర్మాణ రంగం అభివృద్ధి కోసం ప్రత్యేక దృష్టి సారించిందని,రాచకొండ లాంటి ప్రాంతాలు సినిమా షూటింగ్స్ కు ఎంతో అనువైనవి మహా రాష్ట్ర మంత్రికి వివరించారు. ప్రపంచస్థాయి ప్రమాణాలతో నిర్మించిన రామోజీ ఫిలిం సిటీలో బాలీవుడ్, హాలీవుడ్ స్థాయి సినిమాలు నిర్మిస్తారని,హైదరాబాద్ తో పాటు తెలంగాణ రాష్ట్రంలో ఉన్న టూరిజం ప్రాంతాలు సినిమాలు నిర్మించేందుకు ఉత్తమ వేదికలుగా తీర్చిదిద్దుతున్నామని మహా రాష్ట్ర మంత్రితో అన్నారు.
తెలంగాణను హాలీవుడ్ స్థాయి ఫిల్మ్ హబ్ గా డెవలప్మెంట్ చేస్తున్నామని మంత్రి వివరించారు. సినిమా పరిశ్రమకు ప్రత్యేక ప్రోత్సాహకాలు,రాయితీలు,సినీకార్మికుల సంక్షేమం లాంటి ప్రోత్సాహక కార్యక్రమాలకు తెలంగాణ ప్రభుత్వం కృషి చేస్తున్నదని తెలిపారు. సినిమా పరిశ్రమ అభివృద్ధికి తెలంగాణ రాష్ట్ర ప్రభుత్వం చేపడుతున్న కార్యక్రమాలు అభినందనీయమని,మహా రాష్ట్రలో కూడా ఇట్లాంటివి అమలు చేసేందుకు తెలంగాణ పర్యటనకు వచ్చినట్లు మహా రాష్ట్ర మంత్రి ఆశిష్ శెలార్ వివరించారు. మహారాష్ట్ర ఫిల్మ్ సిటీని విజిట్ చేయాలని మంత్రి కోమటి రెడ్డి వెంకట్ రెడ్డినీ మహారాష్ట్ర మంత్రి ఆశిష్ శెలార్ ప్రత్యేకంగా ఆహ్వానించారు.