రీజినల్ రింగ్ రోడ్డు, రేడియల్ రోడ్స్, ఇతర సమస్యలపై ప్రధానమంత్రి సమయం తీసుకుని స‌మిష్టిగా కలుద్దామ‌ని మెద‌క్ ఎంపీ ర‌ఘునంద‌న్ రావు స‌మావేశంలో చెప్పారు. అంతేకాక ఆదిలాబాద్ – పటాన్ చెరు రైల్వే లైన్ పై సాధ్యాసాధ్యాలు, డీపీఆర్ ఏమైనా చేశారా అని అడిగారు. రాష్ట్రానికి కేటాయించిన ఐఏఎస్, ఐపీఎస్ కేడర్ అలాట్ మెంట్ గురించి పూర్తి సమాచారాన్ని అందిస్తే.. సంబంధిత మంత్రిని పార్టీల‌కు అతీతంగా క‌ల‌సి లేఖ ఇద్దామ‌ని ప్ర‌తిపాదించారు. రాష్ట్ర ప్ర‌యోజ‌నాల విషయంలో అందరం క‌లిసిక‌ట్టుగా ముందుకు వెళదామ‌ని చెప్పారు. అంతేకాక రాష్ట్రానిక అవ‌స‌రం అయిన బొగ్గు గనుల విషయంలో అందరం కలిసి కోల్ మినిస్టర్ కలుద్దామ‌ని ప్ర‌తిపాదించారు. మెద‌క్ ఎంపీ ర‌ఘునంద‌న్ రావు ప్ర‌తిపాదించిన విష‌యం అత్యంత ఆహ్వానించ‌ద‌గ్గ‌ద‌ని నాగ‌ర్ క‌ర్నూల్ ఎంపీ మ‌ల్లు ర‌వి చెప్పారు. రీజ‌న‌ల్ రింగ్ రోడ్, రేడియల్ రోడ్స్, ఇతర ర‌హ‌దారులు, పెండింగ్ అంశాల‌పై అఖిల‌ప‌క్ష స‌భ్యులంతా కలిసి నేరుగా ప్ర‌ధాన‌మంత్రికి లేఖ ఇద్దామ‌ని మ‌ల్లు ర‌వి చెప్పారు. మ‌హ‌బూబ్ న‌గ‌ర్ ఎయిర్ పోర్ట్ పై పూర్తి స‌మాచారంకు సంబంధించి కేంద్రానికి లేఖ రాయాల‌న్నారు. గద్వాల-దోర్నకల్ రైల్యే లైన్ సర్వేపైనా సమాచారాన్ని ఆయ‌న కోరారు.
పోల‌వ‌రం ప్రాజెక్ట్ పూర్త‌యితే బ్యాక్ వాట‌ర్ వ‌ల్ల త‌మ నియోజ‌క‌వ‌ర్గ ప్ర‌జ‌లు తీవ్రంగా న‌ష్ట‌పోతార‌ని మ‌హ‌బూబాబాద్ ఎంపా బ‌లరామ్ నాయ‌క్ చెప్పారు. ప్రాజెక్ట్ లో నీరు నింపితే వ‌చ్చే బ్యాక్ వాట‌ర్ ముంపు వ‌ల్ల ల‌క్ష‌మందికి పైగా ముంపు బారిన ప‌డే అవ‌కాశం ఉంద‌ని చెప్పారు. ఈ స‌మ‌స్య‌పైనా ప‌రిష్కారం కావాల‌ని చెప్పారు. ములుగు – ఏటూరు నాగారం ర‌హ‌దారిని కేంద్రం మంజూరు చేసినా ఇప్ప‌టికి టెండ‌ర్ ఖ‌రారు కాలేద‌ని చెప్పారు. అట‌వీ, ప‌ర్యావ‌ర‌ణ అనుమ‌తులు రాక‌పోవ‌డం వ‌ల్లే అల‌స్యం అవుతోంద‌ని చెప్పారు. దీనిపై కేంద్రాని లేఖ రాయ‌డం కానీ, పార్ల‌మెంట్ లో ప్ర‌స్తావ‌న చేయ‌డం కానీ చేయాల‌ని అన్నారు. రాష్ట్రంలో ఎంజీఎన్ఆర్ఈజీఎస్ కార్య‌క్ర‌మంలో ప‌ని దినాలు బాగా త‌గ్గుతున్నాయ‌ని జ‌హీరాబాద్ ఎంపీ సురేష్ షెట్కార్‌ చెప్పారు. ప‌ని దినాలు త‌గ్గడం వ‌ల్ల పేద‌ల‌కు ఉపాధి లేకుండా పోవ‌డంతో పాటు.. గ్రామాల్లో అభివృద్ధి ప‌నులు నిలిచిపోతాయ‌ని అన్నారు. అంతేకాక మా లోక్ స‌భ ప‌రిధిలో జ‌హీరాబాద్-బీద‌ర్ ర‌హ‌దారి అత్యంత కీల‌క‌మైంది. దీనిపై కేంద్రానికి లేఖ రాయ‌డంతో పాటు.. పార్ల‌మెంట్ స‌మావేశాల్లో ప్ర‌స్తావ‌న తీసుకురావాల‌ని అన్నారు.
అదిలాబాద్ విమానాశ్ర‌య నిర్మాణం కోసం 800 ఎక‌రాలు అవ‌స‌రం అవుతాయ‌ని రాష్ట్ర ప్ర‌భుత్వం జిల్లా క‌లెక్ట‌ర్ కు లేఖ రాసిందని అదిలాబాద్ ఎంపీ గోడెం న‌గేష్ చెప్పారు. ఇప్ప‌టికే అక్క‌డ 369 ఎక‌రాలు ఉన్నాయి. ప్ర‌భుత్వం పేర్కొన్న 700 ఎక‌రాల్లో ఈ 369 ఎక‌రాలు అంతర్భ‌గామేనా.. లేక 700 ఎక‌రాలు అద‌నంగా సేక‌రిస్తున్నారా? అని ప్ర‌శ్నించారు. దీనికి ప్ర‌భుత్వ అధికార‌లు స్పందిస్తూ.. ఎయిర్ పోర్ట్ నిర్మాణానికి సంబంధిత అధికారులు ఇతర అవ‌స‌రాల‌కు మొత్తంగా వెయ్యి ఎక‌రాలు అవ‌స‌రం అవుతాయ‌ని లేఖ రాశారు. అందుకు అనుగుణంగా ఇప్ప‌టికే ఉన్న 369 ఎక‌రాల‌కు అద‌నంగా మ‌రో 700 ఎక‌రాల భూ సేక‌ర‌ణ చేయాల‌ని చెప్పారు. వ‌రంగ‌ల్ న‌గ‌రంలో అండ‌ర్ గ్రౌండ్ డ్రైనేజీ కోసం ఏమైనా ప్ర‌తిపాద‌న‌లు ఉన్నాయా? అని ఎంపీ క‌డియం కావ్య అడిగారు. ఈ విష‌యంపై కేంద్రానికి లేఖ రాయ‌డంతో పాటు.. స‌మావేశాల్లో లేవ‌నెత్తాల‌ని అన్నారు.