హైదరాబాద్: నైపుణ్యాభివృద్ధి మరియు ఉపాధి అవకాశాల కోసం హెటెరో ఫార్మాస్యూటికల్స్తో అవగాహన ఒప్పందం కుదుర్చుకున్న ఇంటర్మీడియట్ విద్యాశాఖ. తెలంగాణ ప్రభుత్వ ఇంటర్మీడియట్ విద్యాశాఖ, రాష్ట్రంలోని ప్రభుత్వ జూనియర్ కళాశాలల్లో చదువుతున్న విద్యార్థులకు పరిశ్రమల అవసరాలకు అనుగుణమైన నైపుణ్యాలను అందించి, ఉపాధి అవకాశాలను మెరుగుపరచే లక్ష్యంతో హెటెరో ఫార్మాస్యూటికల్స్ సంస్థతో అవగాహన ఒప్పందం (MoU) కుదుర్చుకుంది. ఈ ఒప్పంద మార్పిడి కార్యక్రమం ఇంటర్మీడియట్ విద్యాశాఖ డైరెక్టర్ శ్రీమతి అభిలాష అభినవ్, ఐఏఎస్, జాయింట్ డైరెక్టర్ యెంక్యా నాయక్, రాష్ట్ర వృత్తి విద్యా సంస్థ (SIVE) ప్రిన్సిపాల్ డా. జ్యోత్స్నా రాణి, అలాగే హెటెరో సంస్థ ప్రతినిధులు డా. ఎస్. వెంకట జయపాల్ రెడ్డి (వైస్ ప్రెసిడెంట్–హెచ్ఆర్), మాధురి ఐ. (సీనియర్ మేనేజర్–హెచ్ఆర్), కర్ణకంటి వేణుమాధవ్ (ఆఫీసర్–హెచ్ఆర్) సమక్షంలో జరిగింది.
ఈ భాగస్వామ్యం ద్వారా హెటెరో సంస్థ పరిశ్రమలతో పరస్పర అనుసంధానం, క్యాంపస్ నియామకాలు, నైపుణ్యాభివృద్ధి శిక్షణ కార్యక్రమాలు, ఇంటర్న్షిప్లు, అధ్యాపకులకు పరిశ్రమల పరిచయం, సీఎస్ఆర్ కార్యక్రమాల కింద ప్రయోగశాలల అభివృద్ధి, అలాగే ముఖ్యంగా లైఫ్ సైన్సెస్ మరియు అనుబంధ విభాగాల్లో చదువుతున్న ఇంటర్మీడియట్ మరియు వృత్తి విద్యార్థులకు ఉపాధి అవకాశాలను కల్పించనుంది. ఈ సందర్భంగా డైరెక్టర్ శ్రీమతి అభిలాష అభినవ్, ఐఏఎస్ మాట్లాడుతూ “విద్యార్థులకు సార్థకమైన వృత్తి అవకాశాలు కల్పించాలనే మా నిబద్ధతకు ఈ భాగస్వామ్యం నిదర్శనం. హెటెరోతో కలిసి పనిచేయడం ద్వారా ఫార్మాస్యూటికల్ రంగానికి అవసరమైన శిక్షణతో పాటు, దీర్ఘకాలిక మరియు స్థిరమైన ఉపాధి అవకాశాలను యువతకు అందిస్తున్నాం.”
హెటెరో సంస్థ వైస్ ప్రెసిడెంట్ (హెచ్ఆర్) డా. ఎస్. వెంకట జయపాల్ రెడ్డి మాట్లాడుతూ
“తెలంగాణ ఇంటర్మీడియట్ విద్యాశాఖతో మా భాగస్వామ్యాన్ని మరింత బలోపేతం చేయడం పట్ల మేము గర్విస్తున్నాము. ఇంటర్మీడియట్ అర్హత కలిగిన యువతకు 300కు పైగా ఉపాధి అవకాశాలు కల్పించడం ద్వారా రాష్ట్ర యువత ఉపాధి సామర్థ్యాన్ని పెంపొందించే ప్రభుత్వ లక్ష్యానికి మేము తోడ్పడుతున్నాము.” వృత్తి విద్యను మరింత బలోపేతం చేయడం, విద్యార్థుల ఉపాధి సామర్థ్యాన్ని పెంచడం, ప్రముఖ పరిశ్రమలతో స్థిరమైన భాగస్వామ్యాలను నెలకొల్పడం ద్వారా తెలంగాణ యువతకు మెరుగైన భవిష్యత్తును అందించడంలో ఈ ఒప్పందం కీలక అడుగుగా ఇంటర్మీడియట్ విద్యాశాఖ భావిస్తోంది.